Rom 1 | WSK | STEP | Imi ani Paul, Jesus Kristus ko ura kari. Kaem aninga tam ale apostle ko aga beteram, ani den gilalong yawara apurekko aga balam.

Romans 1

Den gira

1 Imi ani Paul, Jesus Kristus ko ura kari. Kaem aninga tam ale apostle ko aga beteram, ani den gilalong yawara apurekko aga balam.

2 Ura nu bitirukko mu Kaem girakala prophet alo nuguring te balam se noko batoga te aniso. 3 Mu den mu noko Kuriang, nanga Biya Jesus Kristus, wore ko balso. Nu David ko gue te kari ko aratam. 4 Ale kueram bare aking barasam mu te Kaem wetang te nanga kausam, mu nu Kaem ko Namar, sokel ago nunguningkiri, Kaem laili kako bagoso iwitatala nu laili kako. 5 Se nu te Kaem gomang nangaram, ale apostle ura mu nangaram, mu sor suen biya ko kariimet te nongomang ningi nunguning aruk se ko kuring karo tumon se nu nup biya taukko. ^{▼▼Rom 1:5 Paul ko apostle ura: Acts 26:16-18; Rom 15:16-21; Gal 2:7-9.} 6 Ale nina Rome ningi den imi ago la ninga ira muram. Mu awuk, Kaem nina agotala ninga auram, nina Jesus Kristus ko kariimet bagaralko mam.

7 Nina Rome Kris alo, Kaem ninga kueso, ale noko kariimet ko bagaralko ninga auram. Se ani tam gawa imi bataguru ningarsam. Anananga Nainet Kaem, nanga Biya Jesus Kristus ilak, nunga nongomang yawara, se nunga lila ningarmon se te bagaralko.

Paul ko gomang nu Rome Kris alo nungarkukko

8 Ani girek mel imi ko ninga manikko. Ani nina nego ko Jesus Kristus nup te aga Kaem amilmil tusam. Mu awuk, nina nengemang ningi nunguning, se sor suen biya ninga ikiman ale balsan. 9 Kaem, ani angamang suwanta te ko ura betesam ale ko Kuriang Jesus ko den gilalong yawara balu lagasam, borta aninga ikiwoso, mu ani tom suen biya aninga ngatangara te nina nego ko ago ngatangasam. 10 Ale tom suen biya ani nu ngatangorsam, noko gomang uwutata aniruk agi mu, aga sanguk se tairatela nengete tairikko. 11 Aninga angamang biyala nina ningarkik ale Korang Bur ko sokel te munan sang ningarik se te sokel ago bagaralko. 12 Mu iwita: nenenga nengemang ningi nunguning mu aninga sanguk, se aninga angamang ningi nunguning mu nenenga sangukko.

13 O aga singsang, nina ikialko, tom suen biya ani nengete tairikko angamin tugu lagakasam. Mu awuk, ani sor saki te ura bitakasam se ko nunguning aratukaso iwitatala, nenenga ningi ura sang bitirik se ko nunguning aratukko angamang aniso. Bare mel saki aga kalokaso se tai laga aitak. 14 Aninga ura mu kariimet suen la nunga sangikko, Greek alo se Greek alo mena mu ta, ikia ago mu se, ikia mena mu. 15 Borta ko ani nina Rome bagasan mu karogo la den gilalong yawara ninga manikko ko angamang biyala aniso.

Jesus ko Den mu sokel karogo

16 Ani den gilalong yawara apurekko me dolasam: mu awuk, mu Kaem ko sokel, kari awiriya gomang ningi nunguning aso wore te sangaru taukko, Juda alo giriman se aitak sor saki betelatala. ^{▼▼Rom 1:16 Jesus ko dugu duap balnakko me dolanakko: Mark 8:38. Den mu sokel ago: 1 Cor 1:18.} 17 Den gilalong yawara iwita nanga kasurso: ana nangamang ningi nunguning te Kaem nanga baluk kariimet ningo diram ma nanga balukko. Lage bo bo ta mena. Kaem ko batoga te iwita aniso, “Kari gomang ningi nunguning aruk, mu Kaem baluk nu kari ningo diram mauk, se kari umutang marak bagurukko.” ^{▼▼Rom 1:17 Habakkuk 2:4. Lage bo bo ta mena: Gal 3:11.}

Kaem kariimet kilek memek betesan mu koma memek nungarso

18 Kaem duruk te ko gomang magara mu wetang te beteram se aringiman. Mu nu kariimet nu nubiring tuman ale kilek memek memek betesan ale te den nunguning menawusan, mu koma memek nungarso. 19 Mu awuk se memek nungarso? Mu Kaem ko munan nuna te noko ikimonko mu wetang te aniso. Ale Kaem kota nunga kausam. 20 Mu awuk, tom nu ali lilim la beteram tai aitak, kariimet mel suen la nu beteram mu wetang te aringiman, ale mu te nuna noko munan saki nuna me arigisan wore am ko ikimonko. Mu nu Kaem Biya bagoso mu ko ikimonko, ale noko sokel tom suen biya ko mu ko ikimonko. Buta se nuna den bo balmon ale “Ani me ikiem,” mamonko mena. ^{▼▼Rom 1:19-20 Kaem ko munan wetang te aniso: Psalm 19:1-6; Acts 14:17; 17:27.}

21 Nuna Kaem ko ikiman, bare nuna nu Kaem ko iwita iki se ko nup me patawukasan, ale amilmil me tuikasan. Mena. Mu nunga ikia maga muruwuram, ale nongomang motam tiromorom pagam. 22 Nuna balukasan, “Ana ikia ago,” makasan, bare nuna ngualara nunguning ngualakasan. ^{▼▼Rom 1:22 “Ana ikia ago” makasan: 1 Cor 1:19-21.} 23 Ale nuna Kaem Biya tom suen biya bagoso mu nup me patawukasan, nubiring tuman ale manga tam gikasan ale aliti kari ko dora, se inanganang, bulmakau, se ma urer buta nodora te nungurukasan ale nunup patawukasan.

24 Umutang ko, Kaem nunga meram, se nongota nunga ikia memek mu karo tuikasan, ale nongota nongota nungumik te munan saki dolara ago wore bitakasan. 25 Nuna den Kaem nunguning ko baluwoso umu sapaman ale den kawel taman. Ale nuna mel Kaem beteram wore nunup patawukasan, ale Kaem mu nup me patawukasan. Bare ana Kaem mel suen biya beteram wore ko nup la tom suen biya patawu se laganakko! Nunguning.

26 Bare nuna uwuta beteman, se umutang ko Kaem nunga meram se nunga nomotam nongomang barasa umutang la karo tuikasan. Imet mu imet kari ago mu ko munan sapakasan ale kilek diram mena mu bitakasan. 27 Se kari betelatala, kari imet ago mu ko kilek sapakasan, ale nongota nongota nunumi te kilek memek betemonko nongomang barasukaso. Kari mu kari saki nungumik te kilek memek dolara karogo mu bitakasan. Ale nunga betera kaora memek umutang ko koma memek tokasan. ^{▼▼Rom 1:27 Kilek memek: Lev 18:22; 1 Cor 6:9.}

28 Nunga ikia te Kaem ilukuawumonko me kuakasan, se Kaem nunga meram se nunga ikia memek mu la karo tuikasan. Ale kilek memek kariimet me betemonko wore nuna bitakasan. 29 Nuna kilek memek duap duap nongote ninguru anikaso. Nuna kilek memek nunguningkiri duap duap bitakasan. Se mel suen biya nononga la ko, se nongomang magara, kari mora se kuera, kager, ining singi, kula kawel. Se nunumi balu maguwura, bo buring ko den bala, 30 saki nomokete bo nup maguwura. Se Kaem ilak betera, nuguring lagara, kuring batoga. Ale nongota nunup patawukasan. Ale kilek memek sang nunga ikia te nongota bitakasan. Ale nunga nunam nonet nuguring batagurukasan. 31 Ikia ningo bo nongote mena. Nuna nongota den bo balukasan bare me karo tuikasan. Ale nunga singsang nunga kuera ale nongomang nungara mu mena. Kaem iwita balam, kariimet kilek umutang te bagomon mu ko koma kuemonko mam mu nuna ko ikikasan. Bare nuna kilek umu am bitakasan. Se mu la mena. Nuna nunga saki kilek uwutata karogo bitakasan mu nunup patawukasan.

32